მინაშვილი ვლადიმერ (ლადო) აკაკის ძე

მინაშვილი ვლადიმერ (ლადო) აკაკის ძე (დ. 15. I. 1939, სოფ. ტობანერი, ახლანდ. ვანის მუნიციპალიტეტი), ფილოლოგი. ფილოლ. მეცნ. დოქტორი (1994), პროფესორი (1997). 1963 დაამთავრა თსუ-ის ფილოლ. ფაკ-ტი. 1967-იდან მუშაობა დაიწყო ამავე უნ-ტის ახ. ქართ. ლიტ-რის ისტ. კათედრაზე. 1990–2006 იყო თსუ-ის ი. ჭავჭავაძის სასწ.-სამეცნ. კაბინეტის ხელმძღვანელი. მ-ის სამეცნ. კვლევა-ძიების ძირითადი სფეროა XIX ს. ქართ. ლიტ-რის ისტორია. იგი ავტორია ნაშრომებისა: „ილია ჭავჭავაძის ლირიკა“ (1977); „ქართველი რომანტიკოსები ლიტერატურისა და ხელოვნების შესახებ“ (1980); „ილია ჭავჭავაძე“ (1995); „ლიტერატურული ნარკვევები და წერილები“ (2003); „ლიტერატურული ნარკვევები“ (2009), „ნარკვევები ქართული ლიტერატურის ისტორიიდან“ (2017) და სხვ.